QEYDİYYAT ÜÇÜN MƏLUMAT

Dəyərli Həmkarlar,

Azərbaycanın Ümummilli lideri Heydər Əliyevin 100 illik yubileyinə həsr olunmuş “Mama-ginekologiya, Reproduktiv Sağlamlıq və Qadın Sağlamlığı üzrə 1-ci Bakı Beynəlxalq Konfransı”nı 15 aprel 2023-cü il tarixində Bakı şəhəri Holiday İnn otelində gerçəkləşdirəcəyimizə dair Sizi məlumatlandırmaqdan dolayı böyük məmnunluq duyuruq.

Bütün dünyada olduğu kimi ölkəmizdə də mama-ginekologiya və reproduktiv sağlamlığa olan marağın ildən ilə artdığını müşahidə edirik. Tibbin bütün sahələrində olduğu kimi mama-ginekologiya və qadın sağlamlığının mühafizəsinə, uzunömürlülüyün təmin olunmasına yönəlik müdaxilələrin sürətli inkişafını, yeni bilgilərin və texnologiyaların, innovativ terapevtik və cərrahi üsulların və metodikaların yarandığını və geniş tətbiqini fərəhlə qeyd edirik.

Konfrans və konqreslər bu dəyişikliklərin təqibi, bilik və bacarıqların paylaşılması və öyrənilməsi üçün olduqca önəmlidir. Əsas məqsədimiz ölkəmizdə mama-ginekologiya, qadın sağlamlığı və reproduktiv sağlamlıq sahələrinin inkişafına töhvə vermək, bu məsələlərlə maraqlanan məsləkdaşlarımızı bir araya gətirən bir konfrans təşkil edərək son illərdə toplanmış yenilikləri paylaşmaq və müzakirə etməkdir.

Həm sizlərin, həm də bu sahədə çalışan klinikaların, texnoloji, avadanlıq və digər təşkilatların və şirkətlərin dəstəyi ilə, 2023-cü ilin 15 aprel tarixində keçirəcəyimiz bu Konfransa sizləri dəvət edirik. Azərbaycan mütəxəssisləri ilə yanaşı Türkiyə, Böyük Britaniya, İsrail və Almaniyadan olan tanınmış ekspertlərin iştirak edəcəyi bu konfransda mama-ginekologiyanın və qadın sağlamlığının ən aktual mövzuları detallı müzakirə ediləcək, plenar çıxışlarla yanaşı gənc tədqiqatçılar və klinisistlərin, habelə rezident həkimlərin poster təqdimatları da dinləniləcəkdir.

Ulu öndər Heydər Əliyevin 100 illik yubileyinə həsr olunmuş “Mama-ginekologiya, Reproduktiv Sağlamlıq və Qadın Sağlamlığı üzrə 1-ci Bakı Beynəlxalq Konfransı”nda Sizlərlə bir arada olmağı arzulayır və gündəlik fəaliyyətinizdə hər birinizə uğurlar diləyirik.

Hörmətlə,